அரசாங்கம் என்னும் அட்டை பூச்சி

நீண்ட ஒரு நெடிய மௌனத்திற்கு பிறகு ஒரு பதிவு.

இந்த முறை தனிப்பட்ட விடயங்கள் பெரிய அளவு இல்லை.

ஆனால் இந்திய பொருளாதாரம் பற்றி பெரிதாக சொல்ல ஒன்றும் இல்லை என்றே சொல்ல முடியும்.

எந்த ஒரு குறிப்பிட்ட காரணியில் இருந்து கூட நல்ல செய்தி கிடைக்காத சூழ்நிலையில் சந்தை ஏறி ஏமாற்று வித்தையைக் காட்டிக் கொண்டு இருந்தது.


குமிழ் வெடிக்கும் முன் பெரிதாக ஊதும். அது தான் சந்தையில் நடந்து  இருக்கிறதோ என்ற சந்தேகமும் வருகிறது.

இதனை நிர்மலா மேடம் பட்ஜெட் தாக்கல் செய்த பிறகு சந்தை புரிந்து கொண்டு இருக்கலாம்.

இந்த பட்ஜெட்டில் பெரிதாக ஒன்றுமே இல்லை. அப்படி ஏதாவது இருந்தால் கீழே கமெண்ட் செய்யுங்கள்.

3.5% அளவிற்கு நிதி பற்றாக்குறை என்று சொல்லி இருக்கிறார்கள். அதுவும்
சாத்தியமா என்று தெரியவில்லை. நான்கு சதவீதத்திற்கும் மேல் செல்ல வாய்ப்புள்ளது.

இது தவிர அம்மையார் தனிப்பட்ட நபர்களுக்கு  வரி குறைப்பு அளித்ததாக செய்திகள் வந்த போது நன்றாக இருந்தது. ஆனால் கடைசியில் அப்படி வரி குறைப்பு வேண்டும் என்றால் வரி விலக்குகள் எதுவும் கிடையாது என்ற ஒரு ஆப்பை சொருகிய போது போதுமடா சாமி என்ற நிலைக்கே சென்று விட்டோம்.

வரி விகிதங்களை எளிமை படுத்துவது நன்று தான். ஆனால் எளிமைப்படுத்தும் போது முந்தைய வரிகளில் இருந்து கொஞ்சமாவது பலன் இருக்க  வேண்டும். இங்கு ஒன்றுமே இல்லை.

ஆறு மாதத்திற்கு முன்னால் கார்ப்பரேட் நிறுவனங்களுக்கு அதிரடி வரியை குறைத்து ஒரு லட்சம் கோடிக்கு மேல் வருமான இழப்பு ஏற்பட்டது. அதில் பத்து பைசா கூட இன்னும் பொருளாதாரத்திற்கு  நன்மை ஏற்படவில்லை.ஆனால் தனி நபர்களுக்கு அட்டை பூச்சி உறிஞ்சுவது போல் வரியை வசூலிப்பது மிகவும் கவலையான விடயம் தான்.

தற்போதைய நிலையில் புது தலைமுறை தான் வீடு அல்லது இன்சூரன்ஸ் போன்றவற்றில் முதலீடு செய்ய வேண்டும்.அதற்கு வரி விலக்கு என்ற ஒன்று இல்லாத சூழ்நிலையில் தொய்வில் இருக்கும் இந்த துறைகள் மேலே எழ எந்த வாய்ப்பும் இல்லை என்றே சொல்லலாம்.

இந்த தளம் ஆரம்பிக்கப்பட்ட நோக்கமே நேர்மறை சிந்தனைகளுடன் முதலீட்டு நோக்கங்களை தருவது தான். ஆனால் இப்படி கழுவி கழுவி ஊற்றி கொண்டே இருந்தால் எதிர்மறை சிந்தனைகள் தான் வரும்.

அதனால்  இனி முதலீடு கட்டுரைகளை பங்குச்சந்தை என்பதையும் தாண்டி பயனுள்ள கட்டுரைகள் எழுத முயலுகிறோம்.