மியூச்சல் பண்ட் முதலீட்டிற்கு சில சுய கேள்விகள் - 3

(14-07-2020 அன்று மீள்பதிவு செய்யப்பட்டது)

Mutual Fund தொடரின் முந்தைய பாகத்தில் எந்த மியூச்சல் பண்ட் நமக்கு தேவை? என்பது பற்றி எழுதி இருந்தோம்.

200க்கும் மேற்பட்ட மியூச்சல் பண்ட் நிதிகள் இருக்கும் சூழ்நிலையில் அதில் 20 நிதிகளை பிரித்தெடுப்பதற்கு நமக்கு எது தேவை? என்பதை சரியாக உணர்ந்து கொண்டாலே போதும்.

முந்தைய பாகத்தின் தொடர்ச்சியாக சில கேள்விகளை நமக்கு நாமாகவே எழுப்பிக் கொள்வது என்பது மிகவும் அவசியமானது. ஏனென்றால் நமது தேவை என்பது மற்றவர்களை விட நமக்கு தான் அதிகம் தெரிந்திருக்கும்.


அதனால் மார்க்கெட்டிங் செய்பவர்களிடம் பேசும் போது குழப்பத்தை தவிர்க்க முடியும். பெரும்பாலும் ஏஜென்ட்கள் பொதுவாக கமிஷன் அதிகமாக வரும் பண்ட்களை தான் அதிகம் பரிந்துரை செய்வார்கள். அந்த சூழ்நிலையில் எமக்கு இது தான் தேவை என்பதை கோடிட்டு காட்டுவது மிகவும் அவசியமானது.

அடுத்து Mutual Fundல் உறுதியாக நிலையான வருமானம் கிடைக்கும் என்று. கண்டிப்பாக எதிர்பார்க்க வேண்டாம். இதுவும் ஒரு வகையில் பங்கு சந்தை சார்ந்த முதலீடே. அதனால் சந்தைக்கேற்ப லாபங்களும் மாறலாம். RISK மற்றும் REWARD போன்றவற்றுக்கு ஏற்றவாறு இது மாறுபடும்.

வயது என்ன?

ஒருவர் தனது காலம் முழுவதும் ஒரே மாதிரியான முதலீட்டு முறைகளை கொண்டு செல்ல முடியாது. வாழ்வின் எஞ்சிய காலம் குறைய குறைய ரிஸ்க்கையும் குறைத்துக் கொள்வது நல்லது.

பென்ஷன் வாங்கி கொண்டிருக்கும் வயதான சமயத்தில் ஓரளவு நிலையான வருமானம் தரும் மியூச்சல் பண்ட்களை கருத்தில் கொள்ளலாம். Debt Fund, Gilt Fund போன்றவை அதிகம் பொருந்தும்.

பார்க்க:  நெருக்கடியில் நிலையான வருமானம் தரும் Gilt Fund

அதே நேரத்தில் இப்பொழுது தான் வேலைக்கு செல்ல ஆரம்பித்து இருந்தால் கொஞ்சம் அதிக ரிஸ்க் எடுக்கலாம். இன்னும் சம்பாதிக்கும் காலம் அதிகமாக இருப்பதால் இழப்புகளை தாங்கும் சக்தி நமக்கு இருக்கும். Equity Fund, Mid Cap fund போன்றவற்றில் அதிக முதலீடு செய்யலாம்.

அதே நேரத்தில் அண்மையில் திருமணமாகி குழந்தை, குடும்பம்  என்று செலவுகளை ஆரம்பித்து இருப்பவர்கள் Balanced Fund போன்றவற்றில் முதலீடு செய்யலாம். அதே நேரத்தில் வருமான வரி சேமிக்க வேண்டும் என்றால் ELSS நிதிகளில் முதலீடு செய்யலாம்.

எதிர்பார்க்கும் லாபம்?

அதன் பிறகு உங்கள் தேவை என்ன என்பதை தெளிவுபடுத்தி கொள்ளுங்கள். ஒருவர் வருடத்திற்கு 50% கூட லாபம் எதிர் பார்க்கலாம். ஆனால் அதற்கான "RISK" பற்றியும் தெரிந்து கொள்வது அவசியம். அதிகமாக லாபம் எதிர்பார்க்கும் போது அதே அளவு நஷ்டங்களையும் எதிர்கொள்ள தயாராக இருக்க வேண்டும். கீழே உள்ளவாறு தேவையை பிரித்துக் கொள்ளவும்.

குறைந்த லாபம் (வருடத்திற்கு 1௦~15%)
இவர்களுக்கு ஏற்றது "Debt Fund"

மத்திம லாபம் (வருடத்திற்கு 20~25%)
இவர்களுக்கு ஏற்றது "Balanced Fund"

அதிக லாபம் (வருடத்திற்கு 30~35%)
இவர்களுக்கு ஏற்றது "Equity fund", மற்றும் "Midcap fund"

முதலீட்டின் நோக்கம்?

அடுத்து ஒவ்வொருவரது முதலீட்டின் நோக்கம் வேறுபடலாம். அதனை பொறுத்தும் மியூச்சல் பண்ட்களை தேர்ந்தெடுக்கலாம்.

வரி சேமிப்புக்கு?
"ELSS Tax Saving Funds" தேர்ந்தெடுக்க.
பார்க்க: வருமான வரி சேமிக்க உதவும் ELSS fund

பதிவான வருமானம் வர  (regular income)?
"Dividend" முறையைத் தேர்ந்தெடுக்க.

நீண்ட கால திட்டமிடல்?
"Growth" முறையைத் தேர்ந்தெடுக்க.

எவ்வளவு காலம் முதலீடு செய்க?

மியூச்சல் பண்ட்களில் முதலீடு செய்யப்படும் நிதி எவ்வளவு காலம் அந்த முதலீட்டில் இருக்கும் என்பதையும் பொறுத்து தேர்ந்தெடுக்கலாம்.

நீண்ட காலம்(,10 வருடம்)
இவர்கள் கொஞ்சம் RISK எடுக்கலாம். காலத்தோடு சேர்ந்து RISK சமநிலைப்படுத்தப்படும்..

மத்திம காலம்(,5 வருடம்)
இவர்கள் "Medium RISK" எடுக்கலாம்.

குறுகிய காலம், (2~3 வருடம்)
இவர்கள் குறைந்த RISK எடுக்கலாம்.

எப்படி முதலீடு செய்ய போகிறோம்?

முன்பை விட தற்போது மியூச்சல் பண்ட்களில் செய்யப்படும் முதலீடு என்பது எளிதாகி விட்டது. வங்கிகளுக்கு செல்ல தேவையில்லை. பங்குகளில் முதலீடு செய்வதற்காக பயன்படும் டிமேட் கணக்குகளை வைத்து இருந்தால்  மாதந்தோறும் பிடித்துக் கொள்வார்கள். அதனை பொறுத்தும் மியூச்சல் பண்ட்களை தேர்ந்தெடுத்து கொள்ளலாம்.

ஒரே தவணையில் 
இதற்கு "Long term saving fund" தேர்ந்தெடுக்கலாம்.

மாதந்தோறும்
இதற்கு "Systematic Investment Plan (SIP)" தேர்ந்தெடுக்கலாம். இதில் ரிஸ்கும் சமநிலைப்படுத்தப்படும் என்பதை கவனிக்க.


இந்த சுய கேள்விகளின்பதில்கள் ஓரளவு எந்த வகை "Mutual Fund" வாங்கலாம் என்பதை முடிவு செய்ய உதவும். அப்படி முடிவு செய்த பிறகு 20 மியூச்சல் பண்ட்களாவது மிஞ்சி இருக்கும். அதில் ஒன்றை தேர்ந்தெடுப்பது? என்பதை அடுத்த பதிவில் பார்க்கலாம்.

அடுத்த பதிவு: மியூச்சல் பண்ட்டை அளவிடுவது எப்படி?  -4